काठमाडौं, ३ जेठ । उपप्रधान एवं गृहमन्त्री रवि लामिछानेले त्रिभुवन अन्तर्राष्ट्रिय विमानस्थलको अनुगमन गरेका छन् । बिहिबार बिहान उनले प्रस्थान, आगमन कक्ष, बोर्डिङ काउन्टर, अध्यागमन काउन्टर, स्टेपलाइज क्षेत्र, अध्यागमन र प्रहरीका कार्यालय, भन्सार जाँचपास, लगेज व्यवस्थापनलगायत क्षेत्रको अनुगमन गरेका हुन् ।

अनुगमनका क्रममा विमानस्थलमा अत्यधिक भिड हुने गरेको विषयमा चासो राख्दै लामिछानेले भीड व्यवस्थापनमा ध्यान दिन सम्बद्ध अधिकारीहरुलाई निर्देशन दिएका थिए ।

साथै उनले विमानस्थललाई उच्च प्रविधियुक्त बनाउन, सौन्दर्यीकरणमा जोड दिन र सहज तथा सुरक्षित ढंगले आउ–जाउ गर्ने वातावरण बनाउन निर्देशनसमेत दिएको लामिछानेको सचिवालयले जनाएको छ ।

गृहमन्त्री लामिछानेलाई विमानस्थल सुरक्षाका अधिकारी, विमानस्थल अध्यागमन कार्यालयका प्रमुख र विमानस्थल नागरिक उड्डयन कार्यालयका प्रमुखले आ–आफ्ना निकायका जिम्मेवारी, जनशक्ति, कार्य प्रणाली र समस्याबारे अवगत गराएका थिए।