काठमाडौं, ११ जेठ । सिद्धबाबा सुरुङ मार्ग निर्माण गर्न जेठ १३ गतेदेखि विस्फोट गराउने काम सुरु गरिने भएको छ ।

आयोजनाका अनुसार जेठ २ गते जिल्ला सुरक्षा समिति रुपन्देही र जेठ १० गते सुरक्षा समिति पाल्पाको निर्णय अनुसार जेठ १३ देखि विस्फोटको काम सुरु गर्ने निर्णय भएको हो । उक्त सुरुङमार्ग चाइना स्टेट इन्जिनियरिङले बनाइरहेको छ ।

आयोजनाले सूचना प्रकाशित गर्दै नेपाली सेना र नेपाल प्रहरीको उपस्थितिमा आवश्यकता अनुसार विस्फोट गराइने र विस्फोटका समयमा सीमित अवधिका लागि सवारी आवगमन रोकिने जानकारी गराएको छ ।

सिद्धार्थ राजमार्ग अन्तर्गत बुटवल–पाल्पा सडक खण्डमा सुरुङ बन्दैछ । विस्फोटको पूर्वाभ्यास शुक्रबार गरिएको छ । शुक्रबार निर्माण स्थलमा नेपाली सेना र नेपाल प्रहरीको उपस्थितिमा विस्फोटको पूर्वाभ्यासको काम गरिएको सिद्धबाबा टनेल प्रोजेक्ट अफिसले जानकारी गराएको छ ।

आयोजनाले पछिल्लो समय सार्वजनिक गरेको अपडेट अनुसार सुरुङ मार्गको भौतिक प्रगति ११.४१ प्रतिशत र वित्तीय प्रगति १७.५ प्रतिशत भएको छ । यस्तै मुख्य टनेलको ८५.७ मिटर खन्ने काम सम्पन्न भइसकेको छ । उक्त सरुङ कुल १ हजा १२६ मिटर लामो बन्नेछ ।