काठमाडौं, १८ जेठ । अत्यधिक गर्मीका कारण वीरेन्द्रनगरभित्रका विद्यालय आइतबारदेखि बन्द एक हप्ता बन्द हुने भएका छन् । निजी विद्यालयको छाता सङ्गठन प्याब्सनले अत्यधिक गर्मी बढेको भन्दै जेठ २० गते आइतबारदेखि एक हप्ताका लागि विद्यालय बन्द गर्ने निर्णय गरेको हो ।

आज वीरेन्द्रनगरको तापक्रम ४० डिग्री सेल्सियस मापन भएको छ । प्याब्सन सुर्खेतका अध्यक्ष बेदप्रकाश ढकालले गर्मीले बालबालिकाको स्वास्थ्यमा असर पर्नसक्ने भन्दै संस्थागत विद्यालय बन्द गर्ने निर्णय भएको जानकारी दिए ।

वीरेन्द्रनगरभित्रका सामुदायिक विद्यालय पनि बन्द गर्ने तयारी गरिएको छ । वीरेन्द्रनगर नगरपालिका शिक्षा शाखा प्रमुख धीरेन्द्र शर्मा लम्सालले गर्मी अत्यधिक बढेको भन्दै नगरभित्रका विद्यालय बन्द गर्ने तयारी गरिएको बताए ।

उनले भने, ‘गर्मी बढेपछि हामीले नगरभित्रका विद्यालय बन्द गर्ने तयारी गरिरहेका छौँ । यदि पानी परेर तापक्रम घट्यो भने विद्यालय बन्द हुँदैनन् । गर्मी यस्तै रह्यो भने आइतबारदेखि विद्यालय बन्द गर्ने निर्णय गर्छौं ।’