कुलेखानी–फाखेल र सिस्नेरी–दक्षिणकाली सडक तीन दिन बन्द हुने
अनलाइनसमय |
काठमाडौं, २ कार्तिक । मकवानपुरको कुलेखानी–फाखेल र सिस्नेरी–दक्षिणकाली सडक तीन दिन बन्द हुने भएको छ ।
नायब उपरीक्षक श्याम अर्यालका अनुसार इन्द्रसरोवर गाउँपालिका–२ सिमखोलामा ह्युम पाइप राख्नुपरेकाले आजदेखि तीन दिनसम्म दुवै सडक बन्द गर्न लागिएको हो ।
दुवै सडकको वैकल्पिक मार्ग हेटौंडा–भैँसे–पालुङ–काठमाडौँ र कान्तिलोकपथ– हेटौँडा–ठिंगन–काठमाडौं प्रयोग गर्न पनि प्रहरीले अनुरोध गरेको छ ।
केही साता अघि अविरल वर्षाको कारण भएको बढीपहिरोले उक्त सडक धेरै स्थानमा प्रभावित छ । हाल सडक सञ्चालनमा ल्याइए पनि सडक वरिपरिका माटो भने हटाइएको छैन ।
