काठमाडौं, २१ जेठ । बुधबार नेपाल स्टक एक्सचेन्ज (नेप्से) परिसूचक घटेको छ । आज नेप्से परिसूचक ११ दशमलव ९७ अङ्कले घटेर दुई हजार ६४६ दशमलव ९५ बिन्दुमा कायम भएको हो ।

आज १ करोड ३७ लाख ८२ हजार ४६८ कित्ता शेयर किनबेच हुँदा ५ अर्ब १६ करोड ३३ लाख बराबरको कारोबार भएको छ । आज कारोबार रकम पनि घटेको छ । अघिल्लो कारोबार दिन मंगलबार ६ अर्ब ६७ करोड ९५ लाख रुपैयाँ बराबरको कारोबार भएको थियो ।

बुधबार १३ समूहको उपसूचकमध्ये ९ को उपसूचक घटेको छ भने ४ समूहको उपसूचक मात्र बढेको छ । व्यापार १ दशमलव ०९, लगानी शून्य दशमलव ०६, म्युचुअल फण्ड शून्य दशमलव ५ र उत्पादन तथा प्रशोधन समूहको उपसूचक शून्य दशमलव ०१ प्रतिशतले बढेको छ ।

फाइनान्स शून्य दशमलव ९१, विकास बैंक शून्य दशमलव ६२, अन्य शून्य दशमलव ४१, निर्जीवन बीमा शून्य दशमलव ३९, होटेल तथा पर्यटन शून्य दशमलव ३७, बैंकिङ शून्य दशमलव ३४, जीवन बीमा शून्य दशमलव ३१, हाइड्रोपावर समूहको उपसूचक शून्य दशमलव २७ प्रतिशतले घटेको छ ।

आज दुई कम्पनीको शेयर मूल्यमा सकारात्मक सर्किट लागेको छ । सर्किट लाग्नेमा ओम मेगाश्रीको, ग्रिन डेभलपमेण्ट बैंक र पियर इनर्जी रहेका छन् । यस्तै सुपर माइ हाइड्रोपावर ८ दशमलव २९, बारही हाइड्रोपावरको शेयर मूल्य ४ दशमलव ५४ प्रतिशतले बढेको छ ।

आज कर्पोरेट डेभलपमेण्ट बैंक ६ दशमलव ८२, उपकार लघुवित्त ४ दशमलव ३४, मिड सोलु हाइड्रोपावर ३ दशमलव ७ र सामुदायिक लघुवित्तको शेयर मूल्यमा ३ दशमलव ३६ प्रतिशतले ह्रास आएको छ ।