काठमाडौं, २३ असार । उज्बेकिस्तानमा एएफसी महिला एसियन कप छनोट खेलेर नेपाली महिला फुटबल टोली स्वदेश फर्किएको छ ।

अखिल नेपाल फुटबल संघ (एन्फा) का महासचिव किरण राई, प्रवक्ता सुरेश शाह लगायतले नेपाली टोलीलाई सोमबार बिहान त्रिभुवन अन्तर्राष्ट्रिय विमालस्थलमा स्वागत गरेका हुन् ।

छनोटको समूह एफमा रहेको नेपाल निर्णायक खेलमा घरेलु टोली उज्बेकिस्तानसँग पेनाल्टीसुटआउटमा पराजित भएपछि अर्को वर्ष मार्चमा अष्ट्रेलियामा हुने महिला एसियन कपमा छनोट हुन असफल रह्यो ।

तेस्रो तथा अन्तिम खेलमा उज्वेकिस्तानसँग पेनाल्टी सुटआउटमा नेपाल ४–२ ले पराजित भएको थियो । पहिलो हाफमा ३–१ ले पछि परेको अवस्थाबाट निर्धारित ९० मिनेटमा नेपाल ३–३ को बराबरी गर्न सफल भएको थियो ।

कप्तान सावित्रा भण्डारी ‘साम्बा’ ले पहिलो हाफमा एक गोल गर्दै टोलीलाई खेलमा फर्काउने संकेत गरेकी थिइन् । दोस्रो हाफमा १ मिनेटको फरकमा गोल गर्दै नेपालले खेलमा पुनरागमन गरेको थियो । ७१ औं मिनेटमा गीता रानाले गोल गरेको अर्को मिनेटमा साम्बाले बराबरी गोल फर्काएकी थिइन् ।

पेनाल्टी सुटआउटमा कप्तान सावित्राको प्रहार बारमा लाग्दा अन्जना रानामगरको प्रहार उज्वेकिस्तानकी गोलकिपरले बचाएकी थिइन् । गीता राना र सबिता रानामगर भने गोल गर्न सफल भएका थिए ।

समूह एफको पहिलो खेलमा लाओसलाई ९–० र दोस्रो खेलमा श्रीलंकालाई ८–० ले हराउँदै सानदार सुरुवात गरेको थियो ।