काठमाडौं, ५ साउन । वर्षापछिको बाढी–पहिरोका कारण मुख्य राजमार्गका ६ ठाउँमा सडक पूर्णरुपमा अवरुद्ध भएको छ । पाँच वटा सडक एकतर्फी रुपमा सञ्चालनमा आएको छ ।

कोशी राजमार्ग, मेची राजमार्ग, तमोर कोरिडोर, कालिगण्डकी कोरिडोर, शहीद राजमार्ग र भेरी कोरिडोरका ६ ठाउँमा सडक पूर्णरुपमा अवरुद्ध छ ।

नेपाल प्रहरीले आज बिहान नौ बजे अध्यावधिक गरेको विवरणअनुसार संखुवासभाको भोटखोला गाउँपालिका ४ बरुणमा कोशी राजमार्ग पूर्णरुपमा अवरुद्ध छ, यो सडक जेठ ६ गते देखि सञ्चालनमा आउन सकेको छैन ।

त्यस्तै पाँचथरको फिदिम नगरपालिका ४ र हिलिहाङ गाउँपालिका ७ को संगमस्थल हेवाखोलामा बाढीले डाइभर्सन बगाउँदा मेची राजमार्ग पनि पूर्णरुपमा अवरुद्ध छ । पाँचथरकै तुम्वेवा गाउँपालिका २ मा पनि बाढीका कारण तमोर कोरिडोर सडक खण्ड बन्द भएको प्रहरीले जनाएको छ ।

कालीगण्डकी कोरिडोर अन्तर्गत नवलपरासी पूर्वको गैंडाकोट नगरपालिका ३ तरङखोलामा बाढीले पूर्णरुपमा बन्द छ ।

प्रहरीका अनुसार रोल्पाको थबाङ गाउँपालिका वडा नम्बर १ र २ मा पनि पहिरो जाँदा शहीद राजमार्ग अवरुद्ध छ । रुकुम पश्चिमको आठबिसकोट नगरपालिका ६ रिजिगारमा बाढीले जाजरकोट डोल्पा भेरी कोरिडोर सडक पूर्णरुपमा अवरुद्ध भएको प्रहरीले जनाएको छ ।

काठमाडौंको टोखा नगरपालिका २ मा अविरल वर्षाका कारण सडमा क्षति हुँदा काठमाडौं–नुवाकोट सडकखण्ड एकतर्फी सन्चालनमा छ । यसैगरी बागलुङको गलकोट नगरपालिका ११ काउसेमा पहिरो खस्दा मध्यपहाडी लोकमार्ग र बागलुङकै बागलुङ नगरपालिका १० दब्ल्याङमा पहिरो झरेकाले कालिगण्डकी कोरिडोर एकतर्फी सन्चालनमा छन् । रोल्पाको परिवर्तन गाउँपालिका ५ ग्रामजिममा र भुर्तिबाङमा पहिरो खस्दा शहीद राजमार्ग एकतर्फी भएको प्रहरीले जनाएको छ ।