काठमाडौं, १२ साउन । अविरल वर्षापछिको बाढीपहिरोका कारण देशभरका आठ राजमार्ग पूर्ण रूपमा अवरुद्ध भएका छन् । पाँच वटा सडक एकतर्फी रुपमा सञ्चालनमा आएको छ ।

नेपाल प्रहरीले आज बिहान १० बजे अध्यावधिक गरेको विवरणअनुसार संखुवासभाको भोटखोला गाउँपालिका ४ बरुणमा कोशी राजमार्ग पूर्णरुपमा अवरुद्ध छ, यो सडक गत जेठ ६ गते देखि सञ्चालनमा आउन सकेको छैन ।

त्यस्तै गत असार २४ गते रसुवामा गएको बाढीले नेपाल र चीन नाका जोड्ने पुल पूर्ण रुपमा बन्द छ । रसुवाकै गोसाइकुण्ड–२ मा पहिरोले पासाङ ल्हामु राजमार्ग पनि पूर्ण रुपमा अवरुद्ध छ ।

सिन्धुपाल्चोकको भोटेकोशीको कोदारीमा पहिरो जाँदा अरनिको राजमार्ग र नुवाकोटको शिवपुरी गाउँपालिकास्थित मध्यपहाडी राजमार्गपनि पूर्ण रूपमा अवरुद्ध भएको प्रहरीले जनाएको छ ।

यस्तै, रुकुम पश्चिमको आठबिसकोट नगरपालिका रिजिगार भन्ने ठाउँमा अविरल वर्षापछिको बाढीले गत असार ९ गतेदेखि जाजरकोट डोल्पा भेरी करिडोर सडक पूर्ण रुपमा बन्द छ ।

हुम्लाको सिमकोट गाउँपालिकास्थित कर्णाली करिडोर र जाजरकोटको छेडगाड नगरपालिकास्थित मध्यपहाडी राजमार्ग पहिरो खस्दा पूर्ण रूपमा अवरोध भएको प्रहरीले जनाएको छ ।

यसैगरी, काठमाडौँको टोखाबाट नुवाकोट जाने सडकखण्ड, बाग्लुङको बाग्लुङ नगरपालिकास्थित कालिगण्डकी करिडोर, नवलपरासी पूर्वको गैँडाकोट नगरपालिकास्थित कालिगण्डकी करिडोर, मुस्ताङको थासाङ गाउँपालिकास्थित बेनी–जोमसोम सडक र रोल्पाको परिवर्तन गाउँपालिकास्थित सहिद राजमार्ग एकतर्फी सञ्चालन आएको प्रहरीले जनाएको छ ।