काठमाडौं, २० साउन । लाओसबाट हवाईमार्ग हुँदै नेपाल ल्याइएको करिब ८ किलो सेतो हेरोइनसहित दुई विदेशी नागरिक पक्राउ परेका छन् ।

पक्राउ पर्नेमा भारतीय नागरिक ३५ वर्षीय फिरोज अहमल र ३२ वर्षीय मौलिस्वरन नजुदामुर्ती कुर्नाल भेल रहेका छन् । उनीहरूलाई लागुऔषध नियन्त्रण ब्यूरोको टोलीले पक्राउ गरेको हो ।

१७ साउनमा लाओसबाट बैंकक हुँदै त्रिभुवन अन्तर्राष्ट्रिय विमानस्थल आइपुगेका फिरोजलाई ४ किलो सेता हेरोइनसहित ब्यूरोको टोलीले विमानस्थलको अराइभल एरियाबाट पक्राउ गरेको थियो ।

यसको भोलिपल्ट लाओसबाटै बैंकक हुँदै आएका भेललाई पनि अराइभल एरियाबाट ३ किलो ८ सय ग्राम सेता हेराइनसहित पक्राउ गरिएको ब्यूरोका सह प्रवक्ता तथा प्रहरी नायव उपरिक्षक जिवन निरौलाले जानकारी दिए ।

पक्राउ परेकालाई लाग औषध (नियन्त्रण) ऐन, २०३३ बमोजिम काठमाडौं जिल्ला अदालतबाट लागू औषध मुद्दामा म्याद थप भई अनुसन्धान भइइरहेको प्रहरीले जनाएको छ ।