काठमाडौं, २५ साउन । अविरल वर्षापछिको बाढीपहिरोका कारण देशभरका सातराजमार्ग पूर्ण रूपमा अवरुद्ध भएका छन् । सात वटा सडक एकतर्फी रुपमा सञ्चालनमा आएको छ ।

नेपाल प्रहरीले अपराह्न ३ः ३० बजे अध्यावधिक गरेको विवरणअनुसार संखुवासभाको भोटखोला गाउँपालिका ४ बरुणमा कोशी राजमार्ग पूर्णरुपमा अवरुद्ध छ, यो सडक गत जेठ ६ गते देखि सञ्चालनमा अझै आउन सकेको छैन ।

त्यस्तै गत असार २४ गते रसुवामा गएको बाढीले नेपाल र चीन नाका जोड्ने पुल पूर्ण रुपमा बन्द छ । रसुवाकै गोसाइकुण्ड–२ मा पहिरोले पासाङ ल्हामु राजमार्ग पनि पूर्ण रुपमा अवरुद्ध छ ।साउन १५ गते उत्तरगया गाउँपालिकाको नौबिसे भन्ने ठाउँमा पहिरो जाँदा गल्छी त्रिशुलीदेखि मैलुङ स्याफ्रु जाने सडक पनि पूर्ण रुपमा अबरोध भएको प्रहरीले जनाएको छ ।

त्यस्तै, सिन्धुपाल्चोकको भोटेकोशीको कोदारीमा पहिरो जाँदा अरनिको राजमार्ग र बाग्लुङको हिजो –शनिबार) कालाखोलामा पहिरो खस्दा कालिगण्डकी करिडोर पुर्ण रुपमा अवरुद्ध छ ।

रुकुम पश्चिमको आठबिसकोट नगरपालिका रिजिगार भन्ने ठाउँमा अविरल वर्षापछिको बाढीले गत असार ९ गतेदेखि जाजरकोट डोल्पा भेरी करिडोर सडक पूर्ण रुपमा बन्द छ ।

यसैगरी, काठमाडौँ– नुवाकोट सडकखण्ड अविरल वर्षापश्चात एकतर्फी रुपमा सञ्चालनमा आएको छ भने, तेह्रथुमको तीनधुरेमा पहिरो खस्दा मध्यपहाडी लोकराजमार्ग पनि एकतर्फी सञ्चालन आएको प्रहरीले जनाएको छ ।

बाग्लुङको बाग्लुङ नगरपालिकास्थित दब्ल्याङको कालिगण्डकी करिडोर, नवलपरासी पूर्वको गैँडाकोट नगरपालिकास्थित कालिगण्डकी करिडोर, लमजुङको बिमिरेभन्ज्याङस्थित मध्यपहाडी लोकराजमार्ग, तनहुँको बन्दिपुर– चुनपहरास्थित पृथ्वि राजमार्ग, दाङको लमही– जालीस्थित राप्ती राजमार्ग, रोल्पाको परिवर्तन– पुत्लाचौरस्थित शहिद राजमार्ग एकतर्फी सञ्चालन आएको प्रहरीले जनाएको छ ।