काठमाडौं, ११ भदौ । तनहुँको बन्दीपुरमा केबलकार सञ्चालन गरिरहेको बन्दीपुर केवलकार एण्ड टुरिजम लिमिटेडले आजदेखि सर्वसाधारणका लागि आईपीओ बिक्री खुला गरेको छ ।

यसअघि कम्पनीले आयोजना प्रभावित क्षेत्रका स्थानीयवासी, वैदेशिक रोजगारीमा रहेका नेपाली, कर्मचारी तथा सामूहिक लगानी कोषका लागि छुट्याइएको शेयर निष्काशन गरी बाँडफाँट गरिसकेको थियो । अब दोस्रो चरणमा साधारण लगानीकर्ताका लागि शेयर खुला गरिएको हो ।

कम्पनीलाई कुल ५८ लाख ६० हजार कित्ता साधारण शेयर निष्काशन गर्ने अनुमति रहेकोमा यसमध्ये ४३ लाख ४१ हजार ८० कित्ता सेयर सर्वसाधारणका लागि छुट्याइएको छ । यस शेयरको अंकित मूल्य प्रतिकित्ता १०० रुपैयाँ तोकिएको छ ।

लगानीकर्ताले न्यूनतम १० कित्तादेखि अधिकतम २० हजार कित्तासम्म आवेदन दिन सक्ने व्यवस्था गरिएको छ । आवेदन अवधि चाँडोमा भदौ १५ गते बन्द हुने र ढिलोमा भदौ २५ गतेसम्म खुला रहने कम्पनीले जनाएको छ ।

क्रेडिट रेटिङ संस्थान केयर रेटिङ नेपालले कम्पनीलाई ‘केयर एनपी डबल बी इश्युअर रेटिङ’ प्रदान गरेको छ । यो रेटिङले कम्पनीको दायित्व पूरा गर्ने क्षमतामा औसत स्तरको जोखिम रहेको देखाउँछ ।