काठमाडौं, १३ भदौ । नेपालमा बीमाको पहुँच र दायरा बढ्दै गएको छ । नेपाल बीमा प्राधिकरणको तथ्यांक अनुसार गत आर्थिक वर्षको अन्त्यसम्ममा बीमाको पहुँचमा रहेको जनसंख्या ४८ दशमलव ३३ प्रतिशत पुगेको छ । अघिल्लो आर्थिक वर्षको अन्त्यमा बीमाको पहुँचमा रहेको जनसंख्या ४३ दशमलव २४ प्रतिशत थियो । एक वर्षमै बीमा उल्लेख्य विस्तार हुनुमा लघुबीमाको पनि ठूलो भूमिका छ । प्राधिकरणको तथ्यांकअनुसार गत आर्थिक वर्षमा सबैभन्दा धेरै बढेको बीमालेखमा लघुबीमा नै रहेको छ ।

लघुबीमकहरू स्थापनाको छोटो समयमै लक्षित वर्गसम्म बीमा सेवा उपलब्ध गराउन अग्रसर देखिएका छन् । गत असारसम्ममा ४५ लाख ७२ हजार लघु जीवन बीमालेख जारी भएका छन्, जुन अघिल्लो वर्षको तुलनामा ६० दशमलव ४५ प्रतिशतले बढी हो । अघिल्लो असारसम्ममा यो संख्या २८ लाख ४९ हजार थियो । जारी भएका समग्र जीवन बीमालेखमा लघु जीवन बीमालेखको हिस्सा ६४ दशमलव ८९ प्रतिशत रहेको छ ।

बीमा ऐन, २०७९ को दफा २६, सरकारको नीति तथा कार्यक्रम र लघुबीमक दर्ता सम्बन्धी निर्देशिका, २०७९ बमोजिम प्राधिकरणको सञ्चालक समितिले तोकेको मूल्यांकनका आधारमा लघु जीवन बीमा कम्पनी तीन र लघु निर्जीवन बीमा कम्पनी ओटालाई लघुबीमा व्यवसाय सञ्चालनको इजाजत दिइएको थियो । प्राधिकरणका अनुसार लघुबीमाको पहुँच तथा व्यवसाय विस्तारका लागि नीतिगत रूपमै सहजीकरण गरिँदै आएको छ ।

गत असारसम्ममा सक्रिय जीवन लघु बीमालेख ४९ लाख ५१ हजारभन्दा बढी पुगेका छन्, जुन अघिल्लो वर्षको तुलनामा ३७ दशमलव ३७ प्रतिशतले बढी हो । सक्रिय जीवन बीमालेखमा लघु बीमालेखको हिस्सा ३१ दशमलव ६८ प्रतिशत रहेको छ । स्थानीय तहका नागरिकमा प्रत्यक्ष पुग्ने लघुबीमकहरूलाई व्यवसाय विस्तारको ठूलो अवसर छ । लक्षित उद्देश्यअनुसार लघुबीमाको विस्तारका लागि जनचेतना र विश्वसनीयतामा जोड दिइएको छ ।

यता, बीमकहरूले पनि बीमालेख विक्री तथा दाबी भुक्तानीमा समेत डिजिटल माध्यमको प्रयोगलाई प्राथमिकतमा राखेका छन् । गत असारसम्ममा जारी निर्जीवन लघु बीमालेख भने ३ लाख ९१ हजार नाघेका छन्, जुन अघिल्लो वर्षको तुलनामा १६५ प्रतिशतले बढी हो । अघिल्लो असारसम्ममा १ लाख ४७ हजार निर्जीवन लघु बीमालेख जारी भएका थिए । समग्र निर्जीवन लघु बीमालेखमा लघुबीमकको हिस्सा ११ दशमलव ६९ प्रतिशत रहेको छ ।

प्रस्तुत छ बिहीबार हिमालय टेलिभिजनमा प्रसारण भएको कार्यक्रम वित्तीय शिक्षाको भिडियो रिपोर्ट :