काठमाडौं, १४ भदौ । बैंक तथा वित्तीय संस्था लगायत पब्लिक लिमिटेड कम्पनीहरूले गत आर्थिक वर्षको चौथो त्रैमासिक वित्तीय विवरण सार्वजनिक गरेका छन् । बैंक तथा वित्तीय संस्थाहरूले कति नाफा कमाए, कति ब्याज आम्दानी गरे, कति सञ्चालन खर्च गरिरहेका छन् लगायत सबै तथ्यांक वित्तीय विवरणमा हुन्छ । बैंक तथा वित्तीय संस्थाबाहेक बीमा, होटल, उत्पादन तथा हाइड्रोपावर कम्पनीहरूले पनि चौथो त्रैमासिक वित्तीय विवरण सार्वजनिक गर्छन् । धितोपत्र बजारमा बजारमा सूचीकृत संस्थाहरूले हरेक ३–३ महिनामा वित्तीय विवरण सार्वजनिक गर्नुपर्छ । वित्तीय विवरण कम्पनीहरूको अवस्था बुझाउने महत्वपूर्ण अभिलेख हो । यसले कम्पनीहरूको वित्तीय स्वास्थ्यको अवस्था बताउँछ । धितोपत्र बजारमा लगानीका रणनीति बनाउन समेत वित्तीय विवरणलाई सबैभन्दा महत्वपूर्ण आधार मानिन्छ । त्यसैले लगानीकर्ताले वित्तीय विवरणबारे बुझ्नु, जानकारी लिनु र अध्ययन गर्नु आवश्यक हुन्छ । वित्तीय विववरणमा आखिर के के कुरा बुझ्नुपर्छ त ? यसलाई कसरी अध्ययन गर्ने ? यस विषयमा हिमालय टेलिभिजनमा बिहीबार प्रसारण भएको कार्यक्रम वित्तीय शिक्षामा नेपाल चार्टर्ड एकाउन्टेन्ट्स संस्था (आईक्यान) उपाध्यक्ष तथा सीए आनन्दराज शर्मा वाग्लेसंग गरिएको कुराकानी :