काठमाडौं, १४ भदौ । पछिल्लो समय पर्यटन क्षेत्रमा बैंक तथा वित्तीय संस्थाको लगानी बढ्दै गएको छ । एक वर्ष अवधिमै यस क्षेत्रमा बैंक तथा वित्तीय संस्थाबाट गएको कर्जा सात गुणाले बढेको छ ।

नेपाल राष्ट्र बैंकको तथ्याङ्क अनुसार गत आर्थिक वर्ष (आव) २०८१/८२ मा बैंक तथा वित्तीय संस्थाले पर्यटन क्षेत्रमा ३ अर्ब ७४ करोड ७० लाख रुपैयाँ कर्जा प्रवाह गरेका छन्, जुन अघिल्लो वर्षको तुलनामा सात गुणा बढी अर्थात ७१४ दशमलव ५६ प्रतिशतले बढी हो । आव २०८०/८१ मा बैंक तथा वित्तीय संस्थाबाट पर्यटन क्षेत्रमा ४६ करोड रुपैयाँ बराबरको कर्जा प्रवाह भएको थियो ।

आव २०८०/८१ को असार मसान्त यता बैंक तथा वित्तीय क्षेत्रले यस क्षेत्रमा प्रवाह गरेको कर्जा १५ दशमलव ०७ प्रतिशतले बढेको छ । यो वर्षमा यस्तो कर्जा २४ अर्ब ८६ करोड ६२ लाख रुपैयाँ थियो । गत आर्थिक वर्षको असार मसान्तसम्ममा यो कर्जा २८ अर्ब ६१ करोड करोड कायम रहेको राष्ट्र बैंकले जनाएको छ ।

होटेल क्षेत्रमा २७.२० अर्ब लगानी

पर्यटन क्षेत्रको प्रमुख पूर्वाधारको रुपमा रहेको होटल क्षेत्रमा समेत पछिल्लो एक वर्षमा बैंक तथा वित्तीय संस्थाले प्रवाह गर्ने कर्जा ३० दशमलव ६१ प्रतिशतले बढेको छ ।

राष्ट्र बैंककका आव २०८१/८२ मा होटल क्षेत्रमा बैंक तथा वित्तीय संस्थाबाट २७ अर्ब २० करोड करोड रुपैयाँ कर्जा प्रवाह भएको छ । अघिल्लो वर्षमा बैंक तथा वित्तीय संस्थाले यस क्षेत्रमा २० अर्ब ८१ करोड रुपैयाँ कर्जा प्रवाह गरेको थियो ।

१२ महिनामा यस क्षेत्रमा जाने कर्जा वृद्धिदर भने १३ दशमलव ९० प्रतिशत रहेको छ । आव २०८०/८१ को असार मसान्तसम्ममा यस क्षेत्रमा गएको कर्जा १ खर्ब ९५ अर्ब ७० करोड थियो । गत आवको असार मसान्तसम्म यो कर्जा २ खर्ब २२ अर्ब ९१ करोड कायम रहेको राष्ट्र बैंकले जनाएको छ ।

तर, लगानीकर्ताले यो लगानी विस्तार नयाँ परियोजनामा मात्र भने होइन । कतिपय हाल सञ्चालनमा रहेका होटेलले क्षमता विस्तार तथा अन्य कामको लगा कर्जा लिन्छन् भने कतिपय नयाँ परियोजनाकै लागि लिन्छन् ।