काठमाडौं, १५ भदौ । यस वर्षको दशैं पर्वलाई लक्षित गर्दै नेपाल राष्ट्र बैंकले नयाँ तथा सुकिला नोट सटही गर्ने सकिने भएको छ । राष्ट्र बैंकका अनुसार आगामी भदौ २९ गतेदेखि असोज १० गतेसम्म सर्वसाधारण तथा संघ-संस्थाले सुकिला नोट साट्न सक्नेछन् ।

यस अवधि भित्र राष्ट्र बैंकका प्रदेशस्थित कार्यालयहरू-विराटनगर, जनकपुर, वीरगञ्ज, पोखरा, सिद्धार्थनगर, नेपालगञ्ज र धनगढीसहित, इजाजत प्राप्त क, ख र ग वर्गका बैंक तथा वित्तीय संस्थामार्फत नोट साट्न सकिने व्यवस्था गरिएको छ ।

राष्ट्र बैंकले दशैंमा बढी प्रचलन हुने नयाँ नोटको मागलाई ध्यानमा राख्दै यो सुविधा उपलब्ध गराएको हो ।