काठमाडौं, १८ भदौ । भिसा अवधि समाप्त भइसकेका वा बिना कागजात बसेका नेपालीलाई अमेरिकाले निरन्तर नेपाल फर्काइरहेको छ । यही क्रममा थप ३७ जना नेपालीलाई डिपोर्ट गरेर नेपाल पठाउन लागिएको हो ।

उनीहरूलाई आज (बुधबार) नै काठमाडौं ल्याउने तयारी भए पनि प्राविधिक कारण देखाउँदै यात्रा तालिका सारिएको छ । त्रिभुवन अन्तर्राष्ट्रिय विमानस्थलस्थित अध्यागमन कार्यालयका अनुसार अब उनीहरू भोलि बिहीबार चार्टर्ड विमानमार्फत काठमाडौं आइपुग्नेछन् ।

एकै पटक ठूलो संख्यामा नेपालीलाई डिपोर्ट गर्ने यो दोस्रो घटना हो । यसअघि २०८२ जेठ २५ गते पनि अमेरिकी सरकारले चार्टर्ड विमानमार्फत ३७ जना नेपालीलाई काठमाडौं पठाएको थियो ।

डोनाल्ड ट्रम्प दोस्रो कार्यकालमा राष्ट्रपति बनेयता हालसम्म २१५ जना नेपाली अमेरिकाबाट डिपोर्ट भइसकेका छन् ।