काठमाडौं, २९ भदौ । प्रधानमन्त्री सुशीला कार्कीले जेनजी आन्दोलनका क्रममा देखिएको भौतिक र मानवीय क्षति कुनै संयोग नभई योजनाबद्ध षड्यन्त्र भएको आशंका गरेकी छन् । आज पदभार ग्रहणपछि सम्बोधन गर्दै उनले आवश्यक संस्थामाथि गरिएका आगजनीका घटना नियोजित भएको उल्लेख गरिन् ।

प्रधानमन्त्री कार्कीले आफ्नै देशका नागरिकले यस्ता कार्य गरे भने उनीहरूलाई ‘नेपाली’ भन्न नहुने टिप्पणी गरिन् । साथै हत्या–हिंसामा संलग्नहरूमाथि छानबिन र कडा कारबाही हुने उनले बताइन् ।

‘नेपाली भएर यो काम गरेको हो भने तिमीलाई नेपाली कसरी भन्ने, यो घटना यो देशमा पहिलोचोटि भएको हो,’ उनले भनिन्, ‘यस्तो संस्कार देखिएको छ, अनुहारै देखाउन नसक्ने घटना भएको छ ।’

कार्कीले आफू जनताकै आग्रह र सडकबाट आएको आवाजका आधारमा प्रधानमन्त्री बनेको भन्दै जिम्मेवारीबाट पछि नहट्ने प्रतिबद्धता जनाइन् । आगामी दिनमा युवाहरूका मागलाई प्राथमिकता दिने आश्वासन समेत उनले दिइन् ।

उनले सरकारलाई ६ महिनाभित्र प्रभावकारी ढंगले सञ्चालन गरी त्यसपछि नयाँ नेतृत्वलाई जिम्मेवारी हस्तान्तरण गर्ने दाबी समेत गरिन् ।