काठमाडौं, ७ असोज । बाराबाट २ सय ३६ किलो अवैध लागूऔषध गाँजासहित प्रहीले एक जनालाई पक्राउ गरेको छ ।

पक्राउ पर्नेमा मकवानपुर कैलाश गाउँपालिका–१० बस्ने ३८ वर्षीय रमेश रूम्बा रहेका छन् । उनलाई सोमबार दिउँसो २ सय ३६ किलो ७५० ग्रामसहित गाँजासहित प्रहरीले पक्राउ गरेको हो ।

इलाका प्रहरी कार्यालय अमलेखगंजबाट खटिएको प्रहरीले मकवानपुरबाट वीरगंजतर्फ आउँदै गरेको बा.२ ख ९५६९ नम्बरको मिनिट्रक तलासी गर्दा छतमाथि सिलिङमा फल्स बटम बनाई त्रिपालले छोपी लुकाईछिपाई राखेको २८ वटा पोकामा रहेको उक्त परिमाणको गाँजा फेला पारी मिनिट्रक चालक रमेशलाई पक्राउ गरेको हो ।

यस सम्बन्धमा आवश्यक अनुसन्धान गरिरहेको प्रहरीले जनाएको छ ।