काठमाडौं, ९ असोज । आज बाढीपहिरोका कारण मुलुकका विभिन्न राजमार्गका ७ वटा सडक पूर्ण रूपमा अवरुद्ध भएको छ । चार वटा सडक एकतर्फी सञ्चालनमा आएका छन् ।

नेपाल प्रहरीले आज बिहान आठ बजे अध्यावधिक गरेको विवरणअनुसार अविरल वर्षाका कारण संखुवासभाको भोटेखोला बरुणस्थित कोशी राजमार्ग पूर्ण रूपमा अवरुद्ध छ । यो राजमार्ग जेठ ६ गतेदेखि अझै सञ्चालनमा आउन सकेको छैन । गत भदौ १५ गतेको अविरल वर्षापछि संखुवासभाकै एकुवा भन्ने ठाउँमा पनि यो राजमार्ग अवरुद्ध छ ।

त्यस्तै, गत असार २४ गते रसुवामा गएको बाढीले नेपाल र चीन नाका जोड्ने पुल र पासाङ ल्हामु राजमार्ग पूर्ण रूपमा बन्द छ । मुग्लिन नजिक तुइन खोलामा आएको पहिरोका कारण नारायणगढ–मुग्लिन सडक पूर्ण रूपमा बन्द छ ।

रोल्पाको लिक्षिवि झरनामा पहिरो जाँदा घोराही रुकुम शहिद राजमार्ग पनि पूर्ण रूपमा अवरुद्ध छ ।

प्रहरीका अनुसार रसुवास्थित त्रिशुली–मैलुङ सडक, बाग्लुङस्थित कालिगण्डकी करिडोर, नवलपरासी पूर्वस्थित पूव–पश्चिम राजमार्ग एकतर्फी रूपमा सञ्चालनमा आएका छन् ।