काठमाडौं, २९ असोज । सरकारको ब्याज अनुदान निकासा प्रवाहित भएपछि सहुलियतपूर्ण कर्जामा असर परेको छ । नेपाल राष्ट्र बैंकका अनुसार चालू आर्थिक वर्ष (आव) २०८२/८३ को पहिलो दुई महिनामा यस्तो कर्जा करिब १ प्रतिशतले घटेको हो ।

उद्यमशील, उत्पादनशील, रोजगारी लगायत क्षेत्रको प्रवद्र्घनका लागि प्रवाह भएर बजारमा कायम सहुलियतपूर्ण कर्जा पहिलो दुई महिनामा शून्य दशमलव ९५ प्रतिशत अर्थात् ३ अर्ब २६ करोड रुपैयाँ घटेको छ । गत साउनमा ७८ अर्ब ६६ करोड रुपैयाँ कायम रहेको ब्याज अनुदानको कर्जा भदौसम्म आइपुग्दा घटेर ७५ अर्ब ३९ करोड रुपैयाँमा खुम्चिएको हो ।

२०८२/८३ मा बजारमा कायम ब्याज अनुदान कर्जामध्ये सबैभन्दा बढी व्यवसायिक कृषि तथा पशुपन्छी क्षेत्रमा छ । यो क्षेत्रमा बजारमा कायम कुल अनुदानको ७१ दशमलव ०८ प्रतिशत अर्थात् ५५ अर्ब ९१ करोड रुपैयाँ छ । यसैगरी महिला उद्यमशीलतातर्फ १८ अर्ब ३७ करोड, कपडा उद्योगतर्फ ८४ करोड, दलित समुदायतर्फ १४ करोड र विदेशबाट फर्केका युवा परियोजनातर्फ ९ करोड रुपैयाँ ब्याज अनुदान कर्जा बजारमा कायम रहेको तथ्याङ्क छ ।