काठमाडौं, १७ कात्तिक । राष्ट्रपति रामचन्द्र पौडेल कतार भ्रमण प्रस्थान गरेका छन् । कात्तिक १८ देखि २० गतेसम्म आयोजना हुने ‘सामाजिक विकासका लागि दोस्रो विश्व शिखर सम्मेलन’ मा सहभागी हुन पौडेल आज बिहान ९ : १० बजे त्रिभुवन विमानस्थलबाट त्यसतर्फ प्रस्थान गरेका हुन् ।

राष्ट्रपति पौडेल कतारका अमिर शेख तमिम बिन हमद अल थानीको निमन्त्रणममा सम्मेलनमा सहभागी हुन त्यसतर्फ प्रस्थान गरेका हुन् ।

राष्ट्रपति पौडेलले कात्तिक १८ गते सम्मेलनको मुख्य सत्रलाई सम्बोधन गर्ने कार्यसुची रहेको छ । सम्मेलनका क्रममा राष्ट्रपति पौडेलसँग कतारका अमिर र संयुक्त राष्ट्रसङ्घका महासचिव एन्टोनियो गुटेरेसलगायत विभिन्न विशिष्ट व्यक्तिहरूको भेटवार्ता हुनेछ ।

१२ सदस्यीय नेपाली प्रतिनिधिमण्डलमा उनको धर्मपत्नी सविता पौडेल, सञ्चारविज्ञ किरणकुमार पोखरेल, राष्ट्रपति कार्यालयका सचिव तथा नेपाल सरकारका अन्य वरिष्ठ अधिकारी सहभागी छन् ।

राष्ट्रपति पौडेल भ्रमण पूरा गरी कात्तिक २० गते स्वदेश फर्कने छन् ।