काठमाडौं, १४ मंसिर । पाकिस्तानले बाफलस्थित ज्ञानोदय माध्यमिक विद्यालयका लागि कम्प्युटर प्रयोगशाला निर्माण गरेको छ ।

पाकिस्तानका राजदूत महामहिम अबरार एच. हाश्मीले शनिबार काठमाडौंको पुरानो कलिमाटी–बाफलस्थित ज्ञानोदय माध्यमिक विद्यालयमा नवस्थापित कम्प्युटर प्रयोगशालाको उद्घाटन गर्दै विद्यालयलाई औपचारिक रूपमा हस्तान्तरण गरेका हुन् । पाकिस्तानका जनताबाट प्राप्त यो सहयोग नेपालमा शिक्षा तथा डिजिटल सिकाइ सुदृढीकरणका लागि निरन्तर सहकार्यको हिस्सा भएको बताइएको छ ।

उद्घाटन कार्यक्रममा समुदायका अगुवा, स्थानीय सरकारका प्रतिनिधि, सामाजिक तथा नागरिक व्यक्तित्वहरू, लगायत पूर्व नेपालका गभर्नर तथा राष्ट्रिय योजना आयोग नेपालका उपाध्यक्ष डा. दीपेन्द्रबहादुर क्षेत्री, विद्यालय व्यवस्थापन समितिका अध्यक्ष रामबाबु कोइराला, शिक्षक–अभिभावक संघका अध्यक्ष देवखर भट्टराई, काठमाडौं महानगरपालिकाको वडा नम्बर १३ का अध्यक्ष ध्रुव नारायण मानन्धर, जिल्ला शिक्षा समन्वय प्रमुख डा. समन्तमणि आचार्य, केएमसी शिक्षा विभागका प्रमुख केशव ज्ञवाली र विद्यालयकी प्रधानाध्यापक श्रीमती विष्णु घिमिरे रिमालको उपस्थिति रहेको पाकिस्तान दूतावासले जारी गरेको विज्ञप्तिमा उल्लेख छ ।

कार्यक्रमलाई सम्बोधन गर्दै राजदूत हाश्मीले विद्यालयको नेतृत्व, शिक्षकहरू तथा समुदायको सक्रिय सहभागिता, समर्पण र प्रभावकारी व्यवस्थापनप्रति प्रशंसा व्यक्त गरे । उनले विद्यालयका विद्यार्थीहरूलाई आधुनिक शिक्षा तथा डिजिटल परिवर्तनलाई अंगाल्दै आफ्नो समृद्ध संस्कृति र परम्परासँग जोडिन समेत आग्रह गरे । साथै, सूचना प्रविधिका साथै कृत्रिम बौद्धिकता, ई–कमर्स, नवप्रवर्तन तथा फिनटेकजस्ता उदाउँदा क्षेत्रमा अवसर खोजी उर्नुपर्नेमा हाश्मीले जोड दिए ।

सोही कार्यक्रममा विद्यार्थी तथा समुदायका अगुवाहरूले विद्यालयमा ‘नेपाल–पाकिस्तान मैत्री समाज’ स्थापना हुने घोषणालाई विशेष स्वागत गरे । साथै, संगीत तथा खेलकुद समाजलाई पाकिस्तान दूतावासबाट प्राप्त हुने आगामी सहयोगप्रति पनि उनीहरूले खुशी व्यक्त गरे ।

पाकिस्तानले सन् २०१३ देखि उक्त विद्यालयको कम्प्युटर प्रयोगशालाका निम्ति फर्निचर, कम्प्युटरलगायत उपकरण सहयोग गर्दै आएको छ । हाल नयाँ स्थापना गरिएको ल्याबमा ४२ वटा नयाँ कम्प्युटर, नयाँ फर्निचर तथा आधुनिक फ्लोरिङ सुविधा रहेको छ, जसले आईसीटी शिक्षालाई अझ प्रभावकारी बनाउने विद्यालयले जनाएको छ । साथै पुरानो ल्याबलाई मर्मतपछि प्राथमिक तहका विद्यार्थीका लागि स्थानान्तरण गरिएको छ, जसले प्रारम्भिक डिजिटल सिकाइलाई थप मजबुत बनाउने अपेक्षा गरिएको छ ।