काठमाडौं, ८ जेठ । घिरौलामा धेरै मात्रामा विषादी भेटिएको छ । काभ्रेबाट बिक्रीका लागि कालीमाटी ल्याइएको घिरौलामा ३६ दशमलव ५१० प्रतिशत अर्गानोफस्फेट नामक विषादी भेटिएको कालीमाटी तरकारी तथा फलफूल बजार विकास समितिले जनाएको छ ।

बिहीबार केन्द्रीय कृषि प्रयोगशालाले कालीमाटी तरकारी बजारका १७ पसलको १७ ओटा तरकारी तथा फलफूल परीक्षण गर्दा घिरौलामा विषादी भेटिएको हो । सो मात्रा उपभोग गर्न केही दिन राखेर खानुपर्ने जनाइएको छ ।

बजारमा कार्वामेट र अर्गानोफस्फेट समूह कीटनाशक विषादीको मात्र परीक्षण गरिँदै आएको छ । यस्तो प्रकारको विषादी ३५ प्रतिशतभन्दा कम उपभोग योग्य, ३५ देखि ४५ प्रतिशतसम्म केही दिन राखेर खान मिल्ने र ४५ प्रतिशतभन्दा बढी खान अयोग्य मानिन्छ ।