काठमाडौं, १० जेठ । गर्मीयाम शुरूसँगै बजारमा तर्बुजाको माग बढ्न थालेको छ । चिसो र रसिलो मानिने तर्बुजा अहिले बजारमा प्रशस्त पाइन्छ । तर नेपालको केही सीमित तराई क्षेत्रहरूमा खेती भए पनि बजारमा भेटिने तर्बुजाको अधिकांश हिस्सा भारतबाट आयात हुन्छ । उत्पादनभन्दा बढी आयातमा निर्भर रहनु पर्ने अवस्था रहेको तथ्याङ्कले नै देखाएको छ ।

भन्सार विभागका अनुसार हरेक वर्ष गर्मीयाममा भारतबाट करोडौ रुपैयाँको तर्बुजा नेपाल भित्रिन्छ । चालू आर्थिक वर्ष (आव)को दश महिनामा १९ हजार ६४३ टन तर्बुजा आयात भएको छ, जुन मूल्यका आधारमा ४५ करोड ८७ लाख रुपैयाँ बराबरको हो ।

गत वैशाख महिनामा मात्र ५ हजार ८२३ टन बराबरको १२ करोड ९६ लाख रुपैयाँको तर्बुजा भित्रिएको तथ्याङ्क छ । आवको १० महिनामा आयातित तर्बुजाबाट सरकारले ८ करोड ७४ लाख रुपैयाँ राजश्व उठाएको छ ।