काठमाडौं, ७ असार । पछिल्लो समय नेपाली भान्साको स्वाद अचार विश्व बजारमा पनि लोकप्रिय बन्दै गएको छ । विभिन्न देशमा गएर बसोबास गरेका नेपाली तथा अचारको स्वाद थाहा पाएकाहरूले माग गर्न थालेसँगै यसको निकासी बढ्दै गएको देखिन्छ ।

भन्सार विभागका अनुसार चालू आर्थिक वर्ष (आव)को ११ महिनामा १५ करोड ९६ लाख रुपैयाँ बराबरको १ लाख ८५ हजार ६७१ किलोग्राम (केजी) अचार बाहिरिएको छ, जुन मूल्यका आधारमा गत साउनको तुलनामा करिब ६ गुणाले धेरै हो । आवको पहिलो महिना (साउन)मा २ करोड २३ लाख रुपैयाँको अचार निकासी भएको तथ्याङ्क छ ।

विशेषगरी नेपालबाट अष्ट्रेलिया, अमेरिका, बेलायत, कोरिया, जापान लगायत मुलुकमा अचार निर्यात गरिँदै आएको छ । गत जेठसम्ममा अष्ट्रेलियामा ३ करोड ७१ लाख, इटलीमा ३ करोड ५८लाख र अमेरिकामा ३ करोड १७ लाख रुपैयाँको अचार बाहिरिएको छ ।

स्रोत भन्सार विभाग
चालू आवको ११ महिनामा नेपालले जेठ मसान्तसम्ममा १८ खर्ब ९२ अर्ब ३६ करोड रुपैयाँको वैदेशिक व्यापार भएको हो, जुन गत आवको यसै अवधिको तुलनामा १८ दशमलव ८० प्रतिशत बढी हो । गत आवको ११ महिनामा १५ खर्ब ९२ अर्ब ९६ करोड रुपैयाँको व्यापार भएको थियो ।

गत जेठसम्ममा निर्यात ७७ दशमलव ७७ प्रतिशतले बढेको छ । गत आवको जेठसम्ममा २ खर्ब ४७ अर्ब ५७ करोड रुपैयाँको निर्यात भएकोमा चालू आवको सोही अवधिमा १ खर्ब ३९ अर्ब २६ करोड रुपैयाँको भएको छ । यसैगरी आवको ११ महिनामा १६ खर्ब ४४ अर्ब ७९ करोड रुपैयाँको आयात भएको छ । गत आवको यसै अवधिमा १४ खर्ब ५३ अर्ब ७० करोड रुपैयाँको भित्रिएको थियो ।