काठमाडौं, १९ असार । गैरकानुनी रुपमा कल सेन्टर तथा मेटो डेटिङ एप र क्रिप्टो कारोबारमा संलग्न ५२ जनालाई प्रहरीले पक्राउ गरेको छ । प्रहरीको केन्द्रीय अन्सन्धान ब्यूरो (सीआईबी) ले मंगलबार ६ चिनियाँ नागरिकसहित ५२ जनालाई ललितपुरको वालिफलस्थित दमकल चोकबाट पक्राउ गरेको हो ।

उनीहरूले घर भाडामा लिएर सोसल सफ्टवोयर डेभलपमेन्ट कम्पनी प्रालि दर्ता गरी गैर कानूनी रूपमा कल सेन्टर तथा मेटो डेटिङ एप संचालन गरिरहेको र सोको शाखाको रूपमा काठमाडौं महानगरपालिका–१३ चागलस्थित एक घर भाडामा लिई विभिन्न नेपाली युवतीहरूलाई प्रलोभनमा पारी डेटिङ एप मार्फत अनलाइन स्क्याम गर्ने गरेका थिए । साथै उनीहरूले क्रिप्टो कारोबार पनि गर्ने गरेको सिआईबीले जनाएको छ ।

प्रहरीले उनीहरूको साथबाट स्रोत नखुलेको १३ लाख ९९ हजार ९ सय ५० रूपैयाँ, ल्यापटप ७ थान र मोबाइल ५४ थान समेत बरामद गरेको छ ।

पक्राउ परेकामध्ये ६ जना चिनियाँ नागरिकहरू उपर अभौतिक मुद्रा सम्बन्धी मुद्धा दर्ता गरी अन्य ४६ जना उपर थप अनुसन्धान गरिरहेको सिआईबीले जनाएको छ । ्