काठमाडौं, ५ भदौ । चालू आर्थिक वर्ष (आव) २०८२/८३ को पहिलो महिना (साउन)मा विराटनगर भन्सार कार्यालयबाट हुने वैदेशिक व्यापार बढेको छ ।

कार्यालयको तथ्याङ्क अनुसार गत आवको साउनको तुलनामा चालू आवको सोही अवधिमा वैदेशिक व्यापार ४९ प्रतिशत बढेको हो । यस कार्यालयबाट चालू आवको पहिलो महिनामा २७ अर्ब ७७ करोड ७४ लाख रुपैयाँको वैदेशिक व्यापार भएको छ भने गत आवको यसै अवधिमा १६ अर्ब २ करोड ४९ लाख रुपैयाँको भएको थियो ।

चालू आवको एक महिनामा २० अर्ब ३६ करोड ७२ लाखको आयात गर्दा निर्यात ७ अर्ब ४१ करोड २ लाख रुपैयाँको मात्रै गरेको तथ्यांक छ ।

२०८२ को साउनमा विराटनगर भन्सारले मासिक लक्ष्यको ७८ दशमलव ५९ प्रतिशत राजस्व संकलन गरेको छ । कार्यालयले ३ अर्ब ३८ करोड ६ लाख संकलन गर्ने लक्ष्य राखेकोमा पहिलो महिनामा २ अर्ब ६५ करोड ६७ लाख रुपैयाँ उठाएको छ ।