काठमाडौं, १५ भदौ । मुक्तिनाथ कृषि कम्पनीले आधुनिक थोक कृषि बजारसम्बन्धी कार्यशाला आयोजना गरेको छ । कम्पनीले अन्तर्राष्ट्रियस्तरको आधुनिक थोक कृषि बजार स्थापना र सञ्चालनको औचित्य, आवश्यकता र लगानी प्रवद्र्धनका लागि शुक्रबार काठमाडौंको लाजिम्पाटमा कार्यशाला आयोजना गरेको हो ।

कार्यशाला कृषि तथा पशुपक्षी विकास मन्त्रालयको सहकार्य, नेपाल उद्योग वाणिज्य महासंघको सहआयोजना र डिएफसिडी–एनएनभी परियोजनाको सहयोगमा भएको हो ।

मुक्तिनाथ कृषि कम्पनीका प्रबन्ध संचालक भरतराज ढकालले किसानहरुले गरेको उत्पादनको बाइव्याक ग्यारेन्टी गरी उत्पादनमा प्रोत्साहन गर्न अन्तराष्ट्रिय स्तरको थोक बजार आवश्यक रहेकोले कार्यक्रमको आयोजना गरिएको बताए ।

कार्यशालामा उद्योग वाणिज्य तथा आपूर्ति मन्त्रालय, कृषि विभाग, नेपाल राष्ट्र बैंक र कृषि उद्यम केन्द्रका विज्ञ तथा सरोकारवालाहरुको सहभागितामा “आधुनिक थोक कृषि बजारः चुनौती र अवसर“ शीर्षकमा प्यानल छलफल गरिएको थियो ।

त्यस्तै, कृषिमन्त्री रामनाथ अधिकारीले साना किसानहरुको जीवनस्तर उकास्न र ठुला किसानहरुलाई सेवा दिने दिशामा नीजि क्षेत्र लाग्नुपर्ने र मुक्तिनाथ कृषि कम्पनीले शुरु गरेको अभियानमा मन्त्रालयको पूर्ण साथ र सहयोग रहने बताए । त्यस्तै, मन्त्रालयका सचिव डा. गोविन्द प्रसाद शर्माले कृषि विधेयक मन्त्रिपरिषदमा लैजाने अन्तिम तयारीमा रहेको र ऐन कार्यन्वयन भएपश्चात उत्पादन, प्रशोधन र बजार व्यवस्थापन सम्बन्धि धेरै विषयहरु समाधान हुने बताए ।

लगानी बोर्डका प्रमुख कार्यकारी अधिकृत शुशिल ज्ञवालीले कृषि सम्बन्धि प्रशोधन, बजारीकरण र अन्य ठुला योजनाहरुलाई अगाडी बढाउन बोर्ड कुरिरहेकोले योजना अगाडी बढाउन सुझाव दिए ।

त्यस्तै, नेपाल उद्योग वाणिज्य महासंघमा उपाध्यक्ष हेमराज ढकालले नीजि क्षेत्रका समस्याहरु समाधानको लागि महासंघले विभिन्न पहलहरु गरिरहेको र बजार व्यवस्थापनको लागि करार खेति ऐन निर्माण गर्नुपर्नेमा जोड दिए ।

आधुनिक थोक बजार स्थापना र संचालनको सम्बन्धमा मुक्तिनाथ कृषि कम्पनी लिमिटेडले भिडियो मार्फत सरकारले जग्गाको व्यवस्थापन र कृषि बजार सम्बन्धि स्पष्ट कानुन जारी गरेमा पुराना बजार संचालकहरु र नयाँ व्यवसायिहरुलाई समेट्दै १० अर्ब पूँजी लगानी गर्न तयार रहेको सन्देश दिएको आयोजकले बताएको छ ।