काठमाडौं, २४ भदाै । मुख्यसचिव एकनारायण अर्यालसहित नेपाली सेना, नेपाल प्रहरीका प्रमुखले थप जनधनको क्षति हुन नदिन संयमता अपनाउन आग्रह गरेका छन् ।

प्रधानमन्त्रीको राजीनामा आइसकेको अवस्थामा संयमित भएर संवादबाट निकास खोज्न उनीहरूले सम्बद्ध पक्षलाई अपिल गरेका छन् ।
मुख्यसचिव एकनारायण अर्याल, प्रधान सेनापति अशोकराज सिग्देल, गृहसचिव गोकर्णमणी दुवाडि, एपीएफका आईजीपी राजु अर्याल, नेपाल प्रहरीका आईजीपी चन्द्रकुवेर खापुङ र राष्ट्रिय अनुसन्धान विभाग प्रमुख हुतराज थापाले उक्त अपिल गरेका हुन् ।

सोमबार (भदौ २३)देखि देशमा जारी प्रदर्शनका क्रममा मृत्यु भएका व्यक्तिहरूप्रति उनीहरूले श्रद्धाञ्जली व्यक्त गरेका छन् । सम्बद्ध परिवारजनमा उनीहरूले समवेदन प्रकट गरेका छन् ।

‘सम्माननीय प्रधानमन्त्रीज्यूको राजिनामा स्वीकृत समेत भएको हुँदा यस विषम परिस्थितिमा थप जनधनको क्षति हुन नदिन आम नागरिक सबैलाई संयमित हुन हार्दिक आग्रह गर्दछौं। यस विषयमा राजनीतिक संवादको माध्यमबाट यथाशक्य छिटो शान्तिपूर्ण समाधान निकाल्न सम्बद्ध सबैमा हार्दिक अपिल गर्दछौं’, लिखित वक्तव्यमा भनिएको छ ।