काठमाडौं, २५ भदौ । राजधानीका विभिन्न स्थानमा भएको लुटपाट, चोरी र तोडफोडका घटनामा संलग्न चार जनालाई महाराजगञ्जस्थित भाटभटेनी सुपर मार्केटबाट पक्राउ गरिएको छ । नेपाली सेना र अन्य सुरक्षा निकायको देशव्यापी परिचालनपछि आज बिहान १० बजेदेखि १ बजेसम्म भइरहेको सुरक्षा कारबाहीमा उनीहरूलाई नियन्त्रणमा लिइएको हो ।

सेनाका अनुसार, डिल्लीबजार–नारायणथान क्षेत्रमा शंकास्पद गतिविधिमा संलग्न व्यक्तिहरू भाग्दा नेपाली रुपैयाँ २ लाख ३२ हजार ५०० र अमेरिकी डलर २५ सय बरामद गरिएको छ । यस क्रममा लुटिएका थप हतियारहरू पनि बरामद गरिएको छ, हालसम्म जम्मा ३२ नाल हतियार हात परेको छ ।

सुरक्षाकर्मीले डडेलधुरास्थित जिल्ला कारागारबाट भागेका २६ जना कैदीवन्दीलाई नियन्त्रणमा लिएका छन् भने काठमाडौं डिल्लीबजारस्थित सदर कारागारबाट भाग्ने प्रयास गरेका कैदीवन्दीलाई पनि रोकिएको छ ।