काठमाडौं, ३ असोज । लामो समयदेखि बजेटविहीन बनेको धरान उपमहानगरपालिकाले चालू आर्थिक वर्ष २०८२/८३ का लागि नीति तथा कार्यक्रमसहितको बजेट पारित गरेको छ । कार्यपालिका बैठकले आज दुई अर्ब २० करोड ७४ लाख ५९ हजार रुपैयाँ बराबरको बजेट स्वीकृत गरेको हो ।

पारित बजेट अब भोली (असोज ४ गते) नगरसभामा अनुमोदनका लागि प्रस्तुत गरिनेछ । यसअघि भदौ २६ गते नगरसभा बोलाउने तयारी भए पनि जेनजी आन्दोलनका क्रममा भएको तोडफोड, लुटपाट र आगजनीका कारण कार्यक्रम स्थगित भएको थियो ।

कानुन अनुसार असार मसान्तभित्र बजेट पारित हुनुपर्ने व्यवस्था भए पनि यसपटक प्रक्रिया करिब तीन महिनापछि मात्र अघि बढ्न सक्यो । बजेट नहुँदा विकास निर्माण, कर्मचारी पारिश्रमिक, सामाजिक सुरक्षा भत्ता, सार्वजनिक सेवा तथा वित्तीय कारोबार ठप्प भएका थिए ।

नगरप्रमुख हर्कराज राई (साम्पाङ) र उपप्रमुख अइन्द्रविक्रम बेघाबीच श्रमदान, प्रशासकीय निर्णय र बजेट सिलिङमा देखिएको मतभेदकै कारण कार्यपालिका बैठक बस्न ढिला भएको हो ।