काठमाडौं, २५ कात्तिक । मंगलबार नेपाल स्टक एक्सचेन्ज (नेप्से) परिसूचक बढेको छ । आज नेप्से परिसूचक ३ दशमलव २१ अङ्कले बढेर दुई हजार ५६५ दशमलव १६ बिन्दुमा कायम भएको हो ।

आज ७९ लाख ४७ हजार ५८ कित्ता शेयर किनबेच हुँदा ३ अर्ब ६२ करोड ६१ लाख रुपैयाँको कारोबार भएको छ । अघिल्लो कारोबार दिन सोमबार ४ अर्ब ५१ करोड ४४ लाख रुपैयाँ बराबरको कारोबार भएको थियो ।

आज १४२ धितोपत्रको शेयर मूल्य बढ्दा १०२ को घटेको छ । यस्तै १० धितोपत्रको भने स्थिर रहेको छ । यसदिन कुल ३२७ धितोपत्र कारोबारमा आएका छन् ।

मंगलबार हाइड्रोपावर शून्य दशमलव ७७, व्यापार शून्य दशमलव ६९, जीवन बीमा शून्य दशमलव ५७, उत्पादन तथा प्रशोधन शून्य दशमलव ३३, म्युचुअल फण्ड शून्य दशमलव २४, बैंकिङ शून्य दशमलव ०७ निर्जीवन बीमा शून्य दशमलव ५ प्रतिशतले बढेको छ ।

यसैगरी अन्य शून्य दशमलव ६७, फाइनान्स शून्य दशमलव ५८, विकास बैंक शून्य दशमलव ४७, होटेल तथा पर्यटन शून्य दशमलव ३८, लगानी शून्य दशमलव २९ र माइक्रोफाइनान्स समुहको उपसूचक शून्य दशमलव ०५ प्रतिशतले घटेको छ ।

आज पाँच कम्पनीको शेयर मूल्यमा सकारात्मक सर्किट लागेको छ । सर्किट लाग्नेमा बन्दिपुर केबलकार एण्ड टुरिजम, साइन रेसुङ्गा डिभेञ्चर, माबुलिङ इनर्जी, बुङ्गल हाइड्रो र सागर डिस्टीलरी रहेका छन् ।

यसदिन सिटी होटेल ४ दशमलव ९६, लक्ष्मी भ्यालु फण्ड ३ दशमलव ७, सिटिजन्स सुपर ३० म्युचुअल फण्ड ३ दशमलव ५६ र पिपुल्स हाइड्रोपावरको शेयर मूल्य ३ दशमलव २८ प्रतिशतले ह्रास आएको छ ।