काठमाडौं, ११ मंसिर । अमेरिकी अनलाइन पत्रिका टाइम डटकमले सन् २०२५ का लागि सार्वजनिक गरेको ‘टप १०० फोटो’ सूचीमा नेपालका दुई तस्बिर चयन भएका छन् । टाइमका अनुसार यी तस्बिरहरूले एक वर्षको घटनालाई मात्र नभई एउटा युगकै परिवर्तनलाई प्रतिनिधित्व गर्छन् ।

टाइमले छनोट गरेका उत्कृष्ट तस्बिरहरूमा धावकको संघर्षपूर्ण अनुहार, आप्रवासीको पीडादायी अवस्था, भूकम्पले ढालेको मुस्कुराइरहेको बुद्धको मूर्ति, रोबोटसम्बन्धी दृश्यहरू तथा अहमदाबादमा एयर इन्डियाको विमानको पुच्छर भवनबाट निस्किएको दुर्लभ क्षण समेत समावेश छन् ।

यी सय तस्बिरमध्ये एक तस्बिर विश्वकै सर्वोच्च शिखर सगरमाथाको हो । गत मे १८ मा खिचिएको उक्त तस्बिरमा पर्वतारोहीहरू सगरमाथाको चुचुरोतर्फ उक्लँदै लामबद्ध भएको दृश्य देख्न सकिन्छ । जसले आरोहणको व्यस्तता र जोखिमलाई एकसाथ झल्काएको छ ।

त्यसैगरी नेपालका तर्फबाट छनोट भएको अर्को तस्बिर गत भदौ २३ र २४ गतेको जेनजी आन्दोलनसँग सम्बन्धित छ । आन्दोलनका क्रममा नेपाल सरकारको मुख्य प्रशासनिक भवन सिंहदरबारमा लागेको आगलागीको दृश्य उक्त तस्बिरमा कैद गरिएको छ ।

भदौ २३ गते भएको प्रदर्शनमा १९ जनाको मृत्यु भएपछि भोलिपल्ट प्रदर्शनकारीहरूले संसद भवनमा आगजनी गरेका थिए । सोही घटनालाई समेटिएको तस्बिर पनि टाइमको शीर्ष १०० सूचीमा परेको हो ।