काठमाडौं, १२ मंसिर । नेपाल राष्ट्र बैंकले १ हजार रुपैयाँ दरका नयाँ नोटको डिजाइन, मुद्रण तथा आपूर्तिमाथि काम गर्ने जिम्मेवारी चिनियाँ कम्पनीसँग सम्झौता गरेको छ । खुला प्रतिस्पर्धामार्फत छनोट भएको चाइना बैंक नोट प्रिन्टिङ एन्ड मिन्टिङ कर्पोरेसनसँग यससम्बन्धी ठेक्का सम्झौता भएको हो ।

राष्ट्र बैंकका अनुसार उक्त कम्पनीले कुल ४३ करोड थान १ हजार दरका नयाँ नोट छापेर आपूर्ति गर्नेछ । यसका लागि आवश्यक प्रक्रिया सम्पन्न गर्दै गत भदौ १० गते बोलपत्र आह्वान गरिएको थियो । प्राप्त प्रस्तावहरूमध्ये सबैभन्दा कम लागत प्रस्ताव गर्ने कम्पनीलाई ठेक्का दिइएको हो ।

सम्झौताअनुसार मुद्रण तथा आपूर्ति खर्चबापत राष्ट्र बैंकले कुल १ करोड ६९ लाख ८५ हजार अमेरिकी डलर भुक्तानी गर्नेछ, जुन हालको विनिमय दर अनुसार करिब २ अर्ब ४२ करोड ६७ लाख रुपैयाँ बराबर पर्छ ।