फागुन-१३, काठमाडौं । गत हप्ता दिएको एक सार्वजनिक मञ्चको भाषणलाई लिएर पार्टी तथा सामाजिक सञ्जालमा कांग्रेस पार्टी सभापति शेरवहादुर देउवाको तिब्र आलोचना भएको थियो । सोहि अभिव्यक्तिबारेको विवाद आइतबार पार्टी कार्यालय सानेपामा बसेको केन्द्रीय कार्यसमितिमा पनि प्रश्न उठे पछि देउवाले स्पष्टिकरण नैं दिनु परेको थियो ।
सभापति देउवाले सार्वजनिक मञ्चबाटै केन्द्रीय सदस्य शेखर कोइरालाको नामै लिएर के हैसियत छ ? भनेपछि कांग्रेस सभापति शेरबहादुर देउवा झन आलोचित भए । सबैको अभिभावक बन्नुपर्ने सभापति नै नेताहरुको नाम लिँदै गाली गलौजमा उत्रिएपछि आलोचना हुनु स्वभाविक थियो ।
नेता गगन थापाले सार्वजनिक मञ्चबाट भइरहेको आरोप प्रत्यारोपबारे समीक्षा गर्नुपर्ने बेला सभापतिले बोलेपछि कार्यकर्तालाई कसले सम्हाल्ने भन्ने प्रश्न गरेका हुन् । पार्टीका बैठकहरुमा खुला बहस छलफल गर्नुपर्ने तर सार्वजनिक मञ्चहरुमा संयमितता अपनाउनुपर्ने उनले जोड दिएका छन् ।
सभापति देउवाले भने उनलाई तत्कालै जवाफ दिदै आफूले शेखर कोइरालालाई दुई पटक बोलाएर धेरै आलोचना नगर्न भन्दा पनि नमानेको उनले बताए । आफ्नो धेरै विरोध नगर्न आग्रह गर्दै हात जोडेको भन्दै उनले भने, जहाँ पनि मलाई नै गाली गरेपछि मैले नबोलेर के गर्ने ? ’ भन्दै प्रति प्रश्न गरेका थिए ।